|
ستوکهولم ده ینگی ییل و نوروز بیره می نشانلندی 2010 ییل، اوچینچی اپریل شنبه کونی ستوکهولم شهریده گی بیورک هاگین سالونیده، " بابر کلتوری انجمنی " تامانیدن اوتکزیلگن طنطنه لی ییغیلیش آرقه لی، ینگی ییل و ینگیلیک نینگ ایلچیسی بولمیش نوروز بیره می نشانلندی. ییغیلیش، انجمن کاتبی وبابرسایتی مسئولی کاظم نیازی تامانیدن آچیلدی. او، محفلگه تشریف بویورگن مهمانلرگه خوش کیلیب سیزایلیق سوزلرینی ایتیب، ییغیلیش دستورینی اعلان قیلدی وسابق انجمن رئیسی تیمور اونگوتدن تشکیلات ایشلرینی صمیمیت بیلن آلیب باریب، بو یولده اوز سعی وکوششینی اَیه مگنی اوچون ممنونیت بیلدیردی. اوندن کیین، انجمن نینگ ینگی رئیسی فنلر دوکتوری پروفیسورعبدالحکیم شرعی جوزجانی نی ینگی ییل مناسبتی بیلن صحبت قیلیشگه دعوت قیلدی. استاد جوزجانی ستاکهولم وسویدن نینگ باشقه شهرلریدن، شونینگدیک المانیه دن کیلگن مهمانلرگه خیر مقدم دیب، نوروز وینگی ییل مناسبتی بیلن اولرنی عایله اعضالری بیلن قوتله دی و برچه لریگه تاتلی حیات وپارلاق کیله جک آرزو قیلدی. استاد جوزجانی، صحبت دوامیده دیدی: شرق خلقلریده ییلنی تورت فصلگه بولیب، حمل آیی نینگ بیرینچی کونینی ینگی ییل نینگ بیرینچی کونی قیلیب بیلگی لنگنلیگی بوتونلی طبیعت قانونلریگه ماس (موافق) تقسیم بولیب، خلقلریمیزنینگ دهاسیدن دلالت بیره دی. حمل آیی نینگ بیرینچی کونی – نوروز، ایسکی زمان بیلن ینگی زمان- قیش بیلن بهارفصل لری -نینگ المشووی برهه سی صفتیده اوزاق عصرلردوامیده، مرکزی آسیا خلقلری، جمله دن تورکی خلقلرتامانیدن اوزلریگه خاص مراسملربیلن نشانلنیب کیلگن. تورکی اولسلر، یشیدیگن منطقه لریده، اوزعرف و اودوم لریگه موافق اوشبو بیرمنی کوتیب آلگنلر. اولر جمله سیدن قوییده گی لرنی ایسله تیش ممکن: - دشت و دله لرگه چیقیب، عیاللر تامانیدن" آق تیرک- کوک تیرک " اویینینی اجرا ایتیش، - سوملک سالیب، کیچقرون اونی پیشیریش جریانیده عیاللر تامانیدن " مونچاق سالیش " اویینی یعنی اوزیگه خاص قیزیقرلی مشاعره نی آلیب باریش. اوشبو مشاعره ده اساسا خلق آغزه کی ادبیاتی فولکلورقوشیقلریدن فایده لنیله دی. ایرکک لرگه خاص اویینلردن: - اولاغ – اوغلاق اویینی. - آت چاپتیریش مسابقه سی اویینی. - قباق آتیش اویینی. - کوچه وکوی، شهر و قشلاقلرده نهال ایکیش عنعنه سی. - محله ومسجدلر بوییچه هربیرعایله نوروزآشی پیشیریب چیقریش واولرنی اویلرگه ترقتیش. و شولرکبی کوپ عنعنه لر و اودوملر. نوروز، تورکی ادبیات، اینقسه اوزبیک شعریتیده کینگ کولمده اوزعکسینی تاپگن. اوزبیک شاعرلری اونگه بغیشلب" نوروزنامه" لریازیب، اونی طبیعت نینگ یشه ریشی، قوت و برکه منبعی صفتیده مقتب کیلگنلر. حضرت نوایی نینگ " هرتونینگ قدراولوبان، هرکونینگ اولسون نوروز " دیگن موجز دعائیه سی، نهایت چیرایلی ومضمونلی بیرمقال سینگری، خلق ایچیده آغیزدن آغیزگه اوتیب یورماقده. نوایی "حیرةالابرار" ده، نوروز و بهارصحنه لریدن بیرینی قوییده گیدیک تصویرلیدی: هر غنچۀ لاله حقۀ لعل آچیلسه لواده شقۀ لعل چون برگی توشارگه میل قیلدی بغری قاره دشت اوزه یاییلدی دشت اوزره که سیراولورصباغه بغری قاره لر اوچر هواغه بونداق قسقه عباره و بلیغ تشبیه بیلن، کوریب تورگنینگیز دیک بیر بدیع منظره نی یره تیش، سهل ممتنع بولیب، نوایی نینگ سحرلی قلمی گه خاصدر. مزارشریف ده اوتکزیله دیگن اوزاق مدتلی قیزیل گل بیرمی (گل سرخ میله سی)، نوایی دوریدن باشلنگن بولیشی ممکن. ملا محمد جان فولکلور قصه سی و اونده ایتیله دیگن قوشیقلر شوندن دلالت بیره دی. انجمنیمیزیعنی بابر کلتوری انجمنی حقیده گپیره دیگن بولسک، اونینگ ایش باشلشی گه آلتی ییل تولدی. اونی رسمیلشتیریب، تیگیشلی ایشلرینی یولگه قوییش بوییچه، تیمورجان اونگوت وباشقرو هیئتی نینگ باشقه اعضالری قوللریدن کیلگونچه سعی وحرکت قیلیب کیلگنلر. مین اولرگه تشکر اظهار ایته من. یقینده کمینه ، یاشلر ایستگینی قبول قیلیب، انجمننی باشقریش وظیفه سینی شرطلی روشده قبول قیلدیم. بو ایسه باشقرو هیئتی وانجمن اعضالری نینگ قید و شرطسیز یاردم بیریشلری شرط دیمکدر. تاکیدلش کیرک که انجمن نینگ آلدیده کونده- لنگ تورگن وظیفه لردن بیری، اونینگ اقتصادی بنیه سینی کوچیتریشدر. بو وظیفه فقط سیزلرنینگ همکارلیک و یاردمینگیز بیلن عملگه آشیریلیشی ممکن. بونینگ اوچون هربیرعایله، بیلگی لنگن حق العضویت نی اوزوقتیده مسئول کیشیگه تاپشیریب، خیریه ایشلرگه اوز حصه سینی قوشیب کیلیشی ضرور. بیز شو قرارگه کیلدیک که بوندن نری، ایریم مراسملرده، کیرک بولگن پیشیریقلرو اوقاتلر، انجمن تامانیدن تیارلنیب مهمانلرگه تقدیم ایتیله دی و حرمتلی عایله لرگه بو باره ده زحمت بیریلمیدی. ایکینچی وظیفه، علمی، ادبی و کلتوری فعالیتلریمیزنی کوچیتیریب، اونینگ ساحه سینی کینگیتیریشدر. بو، انجمن نینگ اساسی وظیفه سیدن عبارت بولیب، خلقیمیزپارلاق اوتمیشی وتاریخده قالدیرگن ایزلری، علم وفن ساحه لریده ایریشگن یوتوقلری و کوپ قیرره لی ملی کلتوریمیزنی تیکشیریش ایشلرینی اوزایچیگه آله دی. اولسیمیزنینگ معنوی قیافه سینی مجسم لشتیروچی مذکو ساحه لرنی بیرینچیدن خلقیمیزگه، سونگره اولکه داش دوست وبرادرملیتلرگه، قاله ویرسه خلق ارا مقیاسده علمی اسلوب اساسیده معرفی قیلیش اینگ مهم بورچیمیز حسابلنه دی. بوعالی مقصدگه ایریشیش اوچون برچه امکانیتلردن فایده لنیشیمیزممکن. حاضرچه بابرسایتینی تخنیک جهتدن اونینگ استعدادلی مسئولی کاظم جان نیازی یاردمیده تیکلب، سایت نینگ میکپی، علمی وادبی یونلیشلرینی بیلگیلب، صفتینی آشیریش، کونده لیک دستوریمیزده توره دی. سایت نشریاتینی تورکی وفارسی تیللرده آلیب باریش، اوندن فایده لنیش حدودینی کینگیتیره دی. شونینگ دیک اولکه داش عالم، ادیب وشاعرلر قتلم لری نینگ همکارلیگینی جلب ایتیش، باشقه سایت لرو نشریاتلربیلن همکار لیکنی یولگه قوییش، بیز اوچون کینگ کولمده قولیلیکلر یره تیب بیره دی. حرمتلی مهمانلر! سیزلرگه معلوم که مدنیت وکلتورهربیر قوم وملت نینگ حقیقی سیماسینی تمثیل ایتوچی وسیله در. اوسیز آدملراوز لیگیدن اوزاقله شیب، اوزیگه وکیله جگیگه نسبتا ایشانچ واعتمادی ضعیف لشه دی، اجتماعی و سیاسی حادثه لرتوغریسیده ایگیلیب، روحی تینچینی قولدن بیره دی. شونینگ اوچون مستملکه چیلراوزتصرفی آستیده آلگن خلقلرنی، ملی کلتورلریدن اوزاقلشتیریب، ملی قدریتلرینی ( ملی ارزشلرینی ) آیاق آستی قیلیش سیاستیدن فایده لنگنلر. ملی کلتورو مدنیتدن اوزاقلشیش، خلقلراوچون یامان عاقبتلرنینگ کیلیب چیقیشیگه سبب بوله دی. مثال اوچون 20 نچی عصر باشلریده فرانسه ده یشاوچی قاره تن- لر، اوزلیک لریدن اوزاقلشگن لیکلری سببلی، آق تنلرنینگ ادا واطوارینی تقلید قیلگن حالده، اولرگه خاص کییملرنی کیییب، قاره رنگ ایکن لیکلرینی یاشیریش اوچون، هم ایرکک لر، هم عیاللر یوزلریگه آق پودر سورتیب یورردیلر. شونداق بیرآغیرشرایط ده، اولرنینگ ملی شاعرلریدن بیری "امه سه دور – امه سه زور"، « مین قاره تن من، قاره تنلیگیم بیلن فخرلنه من!» دیگن شعار بیلن اوز شعرلرینی نشر قیلیب، خلقی نیگ اوستیگه آغیرلیک قیلیب کیله یاتگن طلسم نی سیندیردی و اولر، پارلاق اوتمیش و ملی شخصیتگه ایگه ایکنلیکلری، شونینگدیک هیچ کیمدن کم ایمس لیکلرینی کورسه تیب بیردی. بو تاریخی و توضیحی مثالدن مقصدیم، کلتور و مدنیت انسانلرنینگ یشش طرزیگه قنچه چوقور تاثیرگه ایگه ایکنلیگینی کورسه تیش ایدی. شونیگ اوچون بیزملی مدنیتیمیزنی کوز قاره چیغیدیک اَوَیلب اسرب، اونی رواجی وتکاملی یولیده بیرتن و بیرجان بولیب کوره -شیلیک. سوز اداغیده ینه بیرمرته نوروز بیرمی بیلن برچه لرینگیزنی قوتلب، هر بیرینگیز گه عایلوی بخت و سعادت آرزو قیله من. اوندن سونگ، انجمن نینگ سابق رئیسی تیمور اونگوت سوزگه چیقیب، قوتلاو پیامیدن کیین، اوتگن ییل جریانیده بجریلگن ایشلر بوییچه معلومات بیردی و استاد جوزجانی گه انجمن نی باشقریش وظیفه سینی قبول قیلگنلیکلری اوچون ممنونیت بیلدیردی. بیلگی لنگن پروگرام اساسیده شیما بیکزاده تامانیدن" تانگ ییلی" عنوانلی شعر اوزبیک تیلیده، پروین جوزجانی تامانیدن "چه روزها" سرلوحه لی شعر، دری تیلیده دکلمه قیلیندی. المانیه دن کیلگن مهمان عبدالبصیر دری تیلیده صحت قیلیب تورکی خلقلر اینیقسه اوزبیکلر بیلن تاجک خلقی نینگ اورته سیده گی دوستانه مناسبتلراوزاق مدتگه ایگه بولیب ازلدن موجود ایکنلیگیگه اورغو بیردی. او اوزبیکلر آره سیده مین هیچ قچان اوزیمنی بیگانه سیزمیمن دیدی. او، بیرقطار جذاب و قیزیقرلی فکاهیلری بیلن محفلنی قیزیتدی. مهمانلراونینگ مطایبه لرینی قرسکلربیلن کوتیب آلدیلر. اوندن کیین مهمانلرترتیب بیریلگن ضیافتگه دعوت ایتیلدیلر. محفل نینگ ایککینچی قسمی یاش آماتورلر خواننده محمد یونس و سهراب قوشیقلریگه بغیشلنگن ایدی. چالغو اسبابینی چلیش و تخنیک واسطه لریدن فایده لنیشده محمد شفیع عظیمی و آیبیک جوزجانی یاردم کورستدیلر. محمد یونس اجراقیلگن اوز بیکچه قوشیقلر یخشی کوتیب آلیندی. کنسرت ملی رقصلر محفلیگه ایلنیب کیتدی. ییغیلیش نهایه سیده لاتری اویینی بولیب اوتیب، شانسلی اشتراکچیلر، بوغ قازانی( دیگ بخار )، کمپل، اوتو، ساعت، وباشقه تحفه لرگه ایگه بولدیلر. محفل یاشلر تامانیدن یولگه قوییلگن تخم اوریشتیریش اویینی بیلن صمیمیت فضاسیده توگه دی. محفل دستورینی، کلتور ایشلری بولیمی نینگ مسئولی کاظم نیازی آلیب باریب، قیسقه چه ایضاحلری و مناسب اورینلرده اوقیگن اوزبیکچه ودری شعرلری بیلن مهمانلرنینگ دقتینی تارتیب کیلدی. راپورتر: ویدا یارقین #
| 
